ठाणे : पुण्यातील बालेवाडी येथील क्रीडासंकुलात नुकत्याच बायथले, ट्रायथले स्पर्धा पार पडल्या. तसेच सांगली येथे ४४वी ज्युनिअर राज्यस्तरीय जलतरण व वॉटरपोलो स्पर्धा पार पडल्या. या दोन्ही स्पर्धांमध्ये ठाण्यातील स्टारफिश स्पोर्टस् क्लबच्या जलतरणपटूंनी उल्लेखनीय कामगिरी करून पदकांची लयलूट केली. त्यामुळे ठाण्याच्या शिरपेचात मानाचा तुरा रोवला गेला आहे.
पुण्यातील स्पर्धांचे निकाल :बायथल प्रकारात आदित्य घाग व नील वैद्य यांनी सुवर्णपदक, तसेच बेस्ट अॅथलीट चॅम्पिनयनशिप पारितोषिक पटकाविले. मिहिका सुर्वे हिने रौप्यपदक पटकावले, तर वेदान्त गोखले याने बायथले प्रकारात कांस्यपदक व ट्रायथले प्रकारात रौप्यपदक पटकावले. ‘यंगेस्ट स्विमर’ म्हणून मीर वीरा याला रायगड जिल्हा मॉडर्न पेंटाथलॉन असोसिएशनचे अध्यक्ष मनोज कांबळे यांनी विशेष पारितोषिक देऊन गौरविले.
आठ वर्षांखालील वयोगटात सर्वांत लहान अॅथलीट वरद कोळी, प्राश्मी गाला, आयुषी आखाडे यांना पदक व प्रमाणपत्र देऊन गौरविण्यात आले. अनीश चव्हाण, सोहम साळुंखे, सर्वेश डोके, आर्यन डोके, ईशा शिंदे, मानव मोरे यांना पदक व प्रमाणपत्र देऊन गौरविण्यात आले. ट्रायथले प्रकारात मानव मोरे यांनी पाचवा क्रमांक पटकावला.
या स्पर्धेला प्रमुख पाहुणे म्हणून आशियाई मॉडर्न पेंटॉथलॉनचे सेक्रेटरी, तसेच भारतीय ऑलिम्पिक संघटनेचे सदस्य नामदेव शिरगावकर व ‘मॉडर्न पेंटाथलॉन ऑफ इंडिया’चे अध्यक्ष सुनील पूर्णपात्रे उपस्थित होते.
सांगलीतील स्पर्धांचे निकाल :जलतरण स्पर्धेत सानिका तापकीर हिने एक सुवर्ण, तीन रौप्य व सहा कांस्यपदके, सानिका नवरे हिने सहा रौप्य व एक कांस्य, तर नील वैद्य याने दोन रौप्य व एक कांस्यपदक पटकावले. वॉटरपोलो स्पर्धेत जय एकबोटे याच्या नेतृत्वाखाली स्टारफिश स्पोर्टस् क्लबच्या जलतरणपटूंनी रौप्यपदक पटकावले. ऋतुजा पोळ हिच्या नेतृत्वाखाली मुलींनीही बाजी मारून रौप्यपदक पटकावले. वरील दोन्ही स्पर्धांसाठी कैलास आखाडे, नरेंद्र पवार, मनोज कांबळे यांच्या मागदर्शनाखाली जलतरणपटूंनी सराव केला.
